اردو ورلڈ کینیڈا (ویب نیوز ) اسرائیلی فوج نے شام کے دارالحکومت دمشق کو نشانہ بنایا جس کے نتیجے میں 20 افراد ہلاک اور متعدد زخمی ہوئے۔
عرب میڈیا کے مطابق شامی آبزرویٹری فار ہیومن رائٹس نے تصدیق کی ہے کہ دمشق پر حالیہ اسرائیلی حملوں کے نتیجے میں 20 افراد اپنی جانوں سے ہاتھ دھو بیٹھے ہیں، ایجنسی نے ایک فوجی ذریعے کے حوالے سے کہا کہ شام کے دارالحکومت دمشق کے مضافات میں آج مغرب میں المزہ کالونی اور قدسیہ میں واقع کئی عمارتوں پر بمباری کی گئی ہے۔اسرائیلی آرمی ریڈیو نے مزید تفصیلات فراہم کیے بغیر کہا کہ اہداف میں دمشق میں فلسطینی اسلامی جہاد تحریک کا ہیڈکوارٹر اور دیگر اثاثے شامل تھے۔
رپورٹ میں کہا گیا ہے کہ اسرائیلی بمباری نے دمشق میں المزہ کالونی کو نشانہ بنایا، ایک ایسا علاقہ جہاں سیکورٹی ہیڈ کوارٹر اور اقوام متحدہ کے دفاتر موجود ہیں، جو حالیہ اسرائیلی کارروائیوں سے بھی متاثر ہوا ہے۔اس سے قبل شامی میڈیا نے جمعرات کو شام کے دارالحکومت دمشق اور حمص شہر میں دھماکوں کی آوازیں سننے کی اطلاع دی تھی۔دوسری جانب لبنان پر اسرائیلی بمباری جاری ہے، گزشتہ 24 گھنٹوں کے دوران 78 لبنانی شہری شہید ہوئے۔عرب میڈیا کے مطابق بیروت کے جنوبی قصبے دحیہ اور رفیق الحریری ہوائی اڈے کے قریب حملے کیے گئے تاہم اسرائیلی حملوں کے دوران ہوائی اڈے پر طیارے چلتے رہے۔لبنان کی وزارت صحت کے مطابق 8 اکتوبر 2023 کو حزب اللہ اور اسرائیل کے درمیان بم دھماکوں کے تبادلے کے آغاز کے بعد سے لبنان میں 3،360 سے زائد افراد ہلاک ہو چکے ہیں، جن میں زیادہ تر عام شہری ہیں۔
