اردو ورلڈ کینیڈا ( ویب نیو ز ) سعودی عرب ملک میں کھیلوں کے فروغ کے لیے اس سال کی انڈین پریمیئر لیگ (آئی پی ایل) کے لیے کھلاڑیوں کی نیلامی کی تقریب کی میزبانی کرے گا۔
اے ایف پی کی رپورٹ کے مطابق آئی پی ایل کے لیے کھلاڑیوں کی دو روزہ نیلامی سعودی عرب کے شہر جدہ میں ہوگی جو ملک کی تاریخ میں پہلی بار کرکٹ کا ایک بڑا ایونٹ ہوگا۔سعودی کرکٹ فیڈریشن کے چیئرمین سعود بن مشعل نے کہا کہ آئی پی ایل کی نیلامی کی تقریب کی میزبانی ملک میں کھیلوں کے فروغ کے لیے ہمارے عزم کا اظہار ہے اور کھیلوں کے عالمی مقابلوں کے لیے بہترین مقام کا مظہر ہے۔سعودی عرب کی تیل کمپنی سعودی آرامکو اور ریاستی سیاحتی ادارے وزٹ سعودی دونوں آئی پی ایل کے سپانسر ہیں۔
واضح رہے کہ سعودی عرب نے حالیہ برسوں میں کھیلوں کے فروغ کے سلسلے میں فٹ بال کے میدان میں نمایاں پیش رفت کی ہے جہاں مشہور بین الاقوامی کھلاڑی کرسٹیانو رونالڈو اور نیمار نے مقامی کلب میں شمولیت اختیار کی ہے۔اس کے علاوہ سعودی عرب دیگر بڑے کھیلوں کے مقابلوں کی میزبانی بھی کرتا ہے جیسے ورلڈ چیمپئن شپ باکسنگ، فارمولا ون ریس، ٹینس اور گالف۔کرکٹ کی مقبولیت سعودی عرب میں پہلے سے موجود ہے، جہاں بڑی تعداد میں تارکین وطن روزگار کے لیے آتے ہیں۔تاہم سعودی کرکٹ فیڈریشن مقامی لوگوں میں کرکٹ کو مقبول بنانے کی کوششیں کر رہی ہے اور اس سلسلے میں سکولوں میں پروگرام بھی متعارف کرائے گئے ہیں۔
فیڈریشن کے کوچ کبیر خان نے اس سال اگست میں عرب نیوز کو ایک انٹرویو میں بتایا تھا کہ ایک عام خیال ہے کہ کرکٹ ایک اسٹریٹ گیم ہے اور ہمیں اس تاثر کو تبدیل کرنے کی ضرورت ہے۔دوسری جانب بورڈ آف کرکٹ ان انڈیا (بی سی سی آئی) نے جدہ میں آئی پی ایل نیلامی کی میزبانی سے متعلق تفصیلات بھی جاری نہیں کیں اور اس سلسلے میں معاہدے اور مالی فوائد سے بھی آگاہ نہیں کیا گیا۔آئی پی ایل 2008 میں اپنے قیام کے بعد سے بی سی سی آئی کے لیے سب سے زیادہ منافع بخش ٹورنامنٹ ثابت ہوا ہے اور اس لیے یہ دنیا کا امیر ترین کرکٹ بورڈ بن گیا ہے۔
