اردو ورلڈ کینیڈا ( ویب نیوز ) ہندوستان میں سپریم کورٹ آف انڈیا نے ٹرائل کورٹس پر مزید احکامات تک عبادت گاہوں کے خلاف کوئی نیا مقدمہ دائر کرنے پر پابندی لگا دی ہے۔
ترک خبر رساں ایجنسی انادولو کی ایک رپورٹ کے مطابق سپریم کورٹ آف انڈیا نے یہ احکامات 1991 کے پلیس آف ورشپ ایکٹ کے خلاف دائر درخواستوں کی سماعت کے دوران جاری کیے تھے۔اس ایکٹ کو عبادت گاہوں (خصوصی دفعات) ایکٹ، 1991 کے نام سے بھی جانا جاتا ہے۔. اس قانون میں کہا گیا ہے کہ عبادت گاہوں کی حیثیت وہی رہے گی جو 15 اگست 1947 کو تھی۔. قانون کے مطابق 15 اگست 1947 سے پہلے موجود کسی بھی مذہب کی عبادت گاہ کو کسی دوسرے مذہب کی عبادت گاہ میں تبدیل نہیں کیا جا سکتا۔
چیف جسٹس سنجیو کھنہ، جسٹس سنجے کمار اور جسٹس کے وی وشواناتھن پر مشتمل سپریم کورٹ آف انڈیا کے بنچ نے کہا کہ عدالتوں کو مزید احکامات تک زیر التواء مقدمات میں کوئی ‘عبوری یا حتمی حکم دینے سے گریز کرنا چاہیے۔پریس ٹرسٹ آف انڈیا نیوز ایجنسی (پی ٹی آئی) کے مطابق، عدالتی بنچ نے کہا، "ہم 1991 کے ایکٹ کے دائرہ اختیار، خصوصیات اور حدود کا جائزہ لے رہے ہیں۔”عدالت نے حکومت کو حکم دیا ہے کہ وہ 4 ہفتوں کے اندر دائر درخواستوں کا جواب جمع کرائے۔بھارتی سپریم کورٹ کا یہ حکم ایک ایسے وقت میں آیا ہے جب ہندو گروپ ماضی میں تعمیر کی گئی مشہور مساجد کی جگہ پر مندر بنانے کا دعویٰ کرتے ہوئے بار بار عدالتوں میں درخواستیں دائر کر رہے ہیں۔
ایک عدالت نے حال ہی میں اجمیر شریف درگاہ کو، جو کہ 13ویں صدی میں مغربی راجستھان کے اجمیر میں قائم کیا گیا ایک مشہور مذہبی ادارہ ہے، کو مندر قرار دینے کی درخواست منظور کی ہے۔اسی طرح عدالت نے بھارتی ریاست اتر پردیش کے شہر سمبھل میں شاہی جامع مسجد کے سروے کی اجازت دی تھی۔. یہ دعویٰ کیا گیا تھا کہ مسجد ایک مندر پر بنائی گئی تھی لیکن سروے کے نتیجے میں جھڑپ ہوئی جس میں کم از کم پانچ افراد ہلاک اور متعدد پولیس اہلکار زخمی ہوئے۔گزشتہ ماہ ایک ہندو گروپ نے دہلی کی مرکزی جامع مسجد کے سروے کا مطالبہ کرتے ہوئے دعویٰ کیا تھا کہ مسجد کے اندر ہندو دیوتاؤں کے مجسمے دفن ہیں۔واضح رہے کہ اس سال ہندو قوم پرست سیاست کی فتح کے طور پر بھارتی وزیر اعظم نریندر مودی نے ایودھیا میں منہدم بابری مسجد کے مقام پر ‘متنازعہ رام مندر کا افتتاح کیا۔
