اردوورلڈ کینیڈا( ویب نیوز)پیپلز پارٹی کے چیئرمین بلاول بھٹو زرداری نے وزیراعظم سے مطالبہ کیا کہ وہ انہیں ہائی پاور سلیکشن بورڈ میں شامل کریں جس کے باعث پیر اور منگل کو ہونے والا ایچ پی ایس بی کا اجلاس جنوری تک ملتوی کردیا گیا۔
حکومتی ذرائع کے مطابق پیپلز پارٹی کے چیئرمین بلاول بھٹو نے وزیراعظم سے مطالبہ کیا ہے کہ وہ انہیں ہائی پاور سلیکشن بورڈ میں شامل کریں کیونکہ وہ گریڈ 21 سے 22 تک کے سینئر افسران کو ترقی دینے کے عمل میں وزیراعظم کے ساتھ شریک ہونا چاہتے ہیں۔
بلاول بھٹو کو ہائی پاور بورڈ میں شامل کرنے کا حتمی فیصلہ وزیر اعظم شہباز شریف کریں گے جس کے بعد ہائی پاور بورڈ کا اجلاس دوبارہ جنوری میں بلائے جانے کا امکان ہے۔
ہائی پاور سلیکشن بورڈ کا آخری اجلاس فروری 2023 میں ہوا تھا۔
ذرائع کے مطابق سینٹرل سلیکشن بورڈ کے اجلاس میں وزرائے اعلیٰ کو افسران کی گریڈ 20 اور 21 میں ترقیوں میں شامل کرنے کی تجویز دی گئی جسے وزیراعظم نے مسترد کرتے ہوئے سینیٹر سلیم مانڈوی والا کو ایس ایس بی میں شامل کر لیا ہے۔ ماضی میں نوید قمر سمیت مختلف سیاسی شخصیات کو ایس ایس بی میں شامل کیا گیا ہے