اردو ورلڈ کینیڈا ( ویب نیوز ) بھارتی فاسٹ باؤلر جسپریت بمراہ کی آئی سی سی چیمپئنز ٹرافی میں شرکت خطرے میں۔
آسٹریلیا کے خلاف بارڈر-گواسکر ٹرافی کے آخری ٹیسٹ میں انجری کے باعث باؤلنگ نہیں کر سکے تھے۔آسٹریلیا کے حالیہ دورے کے اختتام پر بمراہ کو کمر میں درد ہوا جس کی وجہ سے وہ سڈنی میں پانچویں ٹیسٹ کی دوسری اننگز میں باؤلنگ نہیں کر سکے ،ہندوستانی کرکٹ بورڈ مبینہ طور پر فروری میں آئی سی سی چیمپئنز ٹرافی کے پیش نظر انگلینڈ کے خلاف آئندہ وائٹ بال سیریز میں بمراہ کو ریسٹ دینے پر غور کر رہا ہے تاکہ وہ ٹورنامنٹ کے لیے مکمل طور پر فٹ ہو سکیں۔
بھارتی میڈیا رپورٹس کے مطابق بمراہ کی انجری کی حالت ابھی تک واضح نہیں ہے اور ان کی شرکت کا فیصلہ ان کی انجری کی حالت پر منحصر ہوگا۔حالیہ بارڈر-گواسکر ٹرافی کے دوران، بمراہ نے 5 ٹیسٹ میچوں میں مجموعی طور پر 151.2 اوورز کرائے اور وہ 32 وکٹوں کے ساتھ سب سے کامیاب بولر رہے۔بھارتی میڈیا رپورٹ میں مزید کہا گیا ہے کہ اگر بمراہ کو گریڈ 1 میں چوٹ لگی ہے تو ان کی صحت یابی میں 2 سے 3 ہفتے لگ سکتے ہیں۔گریڈ 2 کی چوٹ کی صورت میں، بمراہ کی صحت یابی میں 6 ہفتے لگ سکتے ہیں، جبکہ گریڈ 3 کی چوٹ اسے 3 ماہ کے لیے چھوڑ سکتی ہے۔
ہندوستان انگلینڈ کے خلاف 5 میچوں کی ٹی ٹوئنٹی سیریز کھیلے گا، جس کا آغاز 22 جنوری سے ہوگا، اس کے بعد 3 ون ڈے کھیلے جائیں گے۔بمراہ سے پہلے ہی ٹی ٹوئنٹی سیریز میں آرام کی توقع تھی لیکن وہ چیمپئنز ٹرافی کی تیاری کے لیے 3 میچوں کی ون ڈے سیریز کھیلیں گے۔تاہم اب ان کی انجری کی حیثیت اس بات کا تعین کرے گی کہ وہ انگلینڈ کے خلاف ون ڈے سیریز کھیلیں گے یا نہیں، جس کے بعد وہ چیمپئنز ٹرافی میں بھی شرکت کریں گے۔واضح رہے کہ آئی سی سی چیمپئنز ٹرافی 19 فروری سے شروع ہوگی۔
