اردو ورلڈ کینیڈا ( ویب نیو ز) یمن میں حوثیوں کے زیر کنٹرول علاقوں میں اسرائیلی فورسز کی شدید بمباری ۔
پاور اسٹیشنز اور فوجی تنصیبات کو نشانہ بنایا گیا۔اسرائیل نے یمنی میزائل اور ڈرون حملوں کے جواب میں جمعے کو یمن میں حوثیوں کے ٹھکانوں کو نشانہ بنایا جن میں پاور اسٹیشن اور ساحلی بندرگاہیں شامل ہیں۔اکتوبر 2023 میں غزہ میں جنگ کے آغاز کے بعد سے، یمنی باغی گروپ نے فلسطینیوں کے ساتھ اظہار یکجہتی کے طور پر اسرائیل پر درجنوں میزائل اور ڈرون فائر کیے ہیں۔غیر ملکی خبر رساں ادارے کے مطابق جمعے کے روز اسرائیلی فوج کے یمن میں حوثیوں کے زیر کنٹرول علاقوں پر حملوں میں حدیدہ اور راس عیسیٰ کی بندرگاہوں، حوثیوں کے پاور اسٹیشن اور فوجی تنصیبات کو نشانہ بنایا گیا۔
ان حملوں میں 1 شخص کے ہلاک اور 16 کے زخمی ہونے کی اطلاعات ہیں۔اسرائیل کے تازہ حملے جمعرات کو یمن سے شروع کیے گئے دو ڈرونز کو فوج نے مار گرانے کے بعد کیے ہیں۔اسرائیلی وزیر اعظم نیتن یاہو نے کہا ہے کہ حوثی اسرائیل کے خلاف اپنے اقدامات کی قیمت چکا رہے ہیں اور انہیں بھاری قیمت چکانا پڑے گی۔دوسری جانب غزہ پر اسرائیلی جارحیت کا سلسلہ جاری ہے اور گزشتہ 24 گھنٹوں کے دوران مزید 22 فلسطینی شہید ہو گئے ہیں۔ اس کے علاوہ اسرائیل نے لبنان پر بھی ڈرون حملہ کیا جس میں 5 شہری شہید ہوئے۔
