اردو ورلڈ کینیڈا ( ویب نیوز ) پاکستان کبڈی فیڈریشن کا 3 ملکی کبڈی ٹورنامنٹ کرانے کا اعلان ۔

بھارت کو بھی ٹورنامنٹ میں شرکت کی دعوت دی گئی ہے۔پاکستان کبڈی فیڈریشن کی جنرل کونسل کا اجلاس فیڈریشن کے صدر اور صوبائی وزیر صنعت و تجارت چوہدری شفیع حسین کی زیر صدارت منعقد ہوا جس میں رواں سال منعقد ہونے والے کبڈی ایونٹس کے بجٹ کی منظوری دی گئی۔فیڈریشن کے صدر چوہدری شفیع حسین نے بتایا کہ سہ ملکی کبڈی ٹورنامنٹ رواں سال اپریل میں منعقد کیا جائے گا۔ بابا گرو نانک کبڈی کپ میں پاکستان، بھارت اور ایران کی کبڈی ٹیمیں شرکت کریں گی۔ انہوں نے کہا کہ کھیل ملکوں کے درمیان باہمی تعلقات کو فروغ دینے میں کلیدی کردار ادا کرتے ہیں۔ بدقسمتی سے مودی سرکار اپنی کھیلوں کی ٹیمیں پاکستان نہیں بھیجتی۔ وہ ہندوستانی کبڈی ٹیم کی شرکت کو یقینی بنانے کی کوشش کریں گے۔