اردو ورلڈ کینیڈا ( ویب نیوز ) پاک بھارت جنگ بندی میں اہم کردار ادا کرنے والے امریکی صدر ڈونلڈ ٹرمپ نے مسئلہ کشمیر کے حل کے حوالے سے بڑا بیان جاری کردیا۔

ٹرمپ نے کہا ہے کہ وہ پاکستان اور بھارت کے ساتھ مل کر یہ دیکھنے کے لیے کام کریں گے کہ کیا کشمیر کے اس مسئلے کا کوئی حل تلاش کیا جا سکتا ہے جو ہزاروں سالوں سے جاری ہے۔اپنے حالیہ بیان میں ٹرمپ نے کہا کہ سفارتی سطح پر نہ صرف پاکستان اور بھارت کے ساتھ تعاون میں اضافہ کیا جائے گا بلکہ دونوں ممالک کے ساتھ تجارتی تعلقات بھی بہتر ہوں گے۔انہوں نے یہ بھی کہا کہ امریکہ نے پاکستان اور بھارت کے درمیان حالیہ کشیدگی کو ختم کرنے میں کلیدی کردار ادا کیا اور دونوں ممالک کو میز پر لایا اور انہیں جنگ بندی پر دستخط کرنے پر آمادہ کیا۔ اس سلسلے میں ٹرمپ نے سوشل میڈیا پر پیغام جاری کرکے جنگ بندی معاہدے کی تصدیق کی تھی۔واضح رہے کہ بھارت کی جارحیت کے جواب میں پاکستان نے 10 سے زائد بھارتی اہداف کو کامیابی سے نشانہ بنایا، جس کے بعد خطے کی صورتحال خاصی کشیدہ ہوگئی۔ٹرمپ کا یہ بیان ایسے وقت میں سامنے آیا ہے جب مسئلہ کشمیر عالمی توجہ حاصل کر رہا ہے اور اقوام متحدہ سمیت کئی ممالک اس تنازع کے پرامن حل کے لیے کوششیں کر رہے ہیں۔