اردوورلڈ کینیڈا( ویب نیوز) پاکستان اور بین الاقوامی مالیاتی فنڈ (آئی ایم ایف) کے درمیان اگلے مالی سال کے بجٹ پر مشاورت کے لیے ورچوئل مذاکرات آج شروع ہوں گے اور 16 مئی تک جاری رہیں گے۔

ذرائع کے مطابق حکومت نئے مالی سال کے بجٹ پر آئی ایم ایف سے مشاورت کرے گی۔ 2025-26 کے بجٹ کے اہداف کا تعین باہمی مشاورت سے کیا جائے گا جبکہ حکومت آئی ایم ایف پروگرام کے تحت اقتصادی اصلاحات جاری رکھے گی۔
ذرائع کا کہنا ہے کہ پاک بھارت کشیدگی نے آئی ایم ایف کی ٹیم کی پاکستان آمد کو متاثر کیا۔ آئی ایم ایف کا وفد اگلے ہفتے پاکستان کا دورہ کرے گا۔
آئی ایم ایف کے دورہ پاکستان میں ایک ہفتے کی تاخیر ہوئی ہے۔.ذرائع کے مطابق آئی ایم ایف کے ساتھ تکنیکی بات چیت میں ڈیٹا شیئر کیا جائے گا اور پالیسی سطح کے مذاکرات میں بجٹ کے اہداف کو حتمی شکل دی جائے گی۔
ذرائع کے مطابق آئندہ بجٹ میں 400 بلین روپے کے ٹیکس اقدامات پر غور کیا جائے گا اور بجٹ میں ٹیکس ریلیف اقدامات پر خصوصی اجلاس بھی ہوں گے۔
تنخواہ دار طبقے کے لیے انکم ٹیکس ریلیف پر آئی ایم ایف کو راضی کرنے کے لیے خصوصی تیاریاں کی جا رہی ہیں۔
آئی ایم ایف کو صنعتوں اور تعمیراتی شعبے کے لیے قائل کرنے کی بھی کوشش کی جائے گی۔. آئی ایم ایف نے بلغاریہ سے وابستہ مس ایوا پیٹرووا کو بھی پاکستان میں مشن کا نیا سربراہ مقرر کیا ہے۔
حکومت عید کی تعطیلات سے قبل 2 جون کو نیا بجٹ پیش کرنے کا منصوبہ بنا رہی ہے۔ آئندہ مالی سال میں بھی مالیاتی پالیسی سخت رہنے کی امید ہے۔ دوسری جانب آئی ایم ایف نے پاکستان سے کہا ہے کہ وہ جی ڈی پی کے 1.6 فیصد کے بنیادی بجٹ سرپلس کے مفروضے پر بجٹ تیار کرے۔