اردو ورلڈ کینیڈا ( ویب نیوز ) شراب پر پابندی ہٹانے کا تصور بھی نہیں کر سکتے، یہ خبر بے بنیاد ہے ،سعودی عرب نے فیفا 2034 کے دوران شراب پر سے پابندی ہٹانے کی افواہوں کی سختی سے تردید کر دی ۔
سعودی حکومت کے ایک سینئر اہلکار نے میڈیا کو بتایا کہ فیفا ورلڈ کپ کے دوران ملک میں شراب پر 72 سالہ پابندی ہٹائے جانے کی اطلاعات بے بنیاد اور گمراہ کن ہیں۔ان رپورٹس کو من گھڑت قرار دیتے ہوئے سعودی حکام نے مزید کہا کہ شراب پر سے پابندی ہٹانے کی تجویز پر کبھی غور نہیں کیا گیا۔سعودی حکام نے مزید کہا کہ اسلام کے مقدس ترین مقامات مکہ اور مدینہ کی سرزمینوں میں شراب فروخت کرنے یا استعمال کرنے کا خیال ناقابل قبول ہے۔
واضح رہے کہ یہ افواہ سب سے پہلے ایک غیر واضح وائن بلاگ پر شائع ہوئی تھی جس کے بعد کچھ بین الاقوامی میڈیا اداروں نے اس خبر کو مزید پھیلایا تھا۔شراب پر سے پابندی ہٹانے کی خبر عام ہوتے ہی سعودی سوشل میڈیا پر شدید ردعمل سامنے آیا۔سوشل میڈیا صارفین نے شراب پر سے پابندی ہٹانے کے اقدام کو مذہبی اور ثقافتی اقدار کو کمزور کرنے کی کوشش قرار دیا۔یاد رہے کہ سعودی عرب نے ولی عہد شہزادہ محمد بن سلمان کی قیادت میں حالیہ برسوں میں ملک میں کئی سماجی اصلاحات نافذ کی ہیں جن میں خواتین کی ڈرائیونگ پر پابندی ہٹانا، عوامی مقامات پر مردوں اور عورتوں کی علیحدگی میں نرمی اور مذہبی پولیس کے اختیارات کو کم کرنا۔لیکن شراب کی فروخت یا کھلے استعمال کی اجازت نہیں تھی۔ یہ پابندی برقرار ہے اور شراب کی فروخت مکمل طور پر ممنوع اور قابل سزا جرم ہے۔
