اردوورلڈ کینیڈا( ویب نیوز)وزیراعظم کے مشیر برائے سیاسی امور رانا ثنا اللہ نے خبردار کیا ہے کہ اگر پاکستان تحریک انصاف (پی ٹی آئی) نے کسی بھی قسم کی احتجاجی مہم یا تحریک شروع کی تو حکومت اسے سختی سے روکے گی اور جو اقدام مناسب سمجھا گیا وہ کیا جائے گا۔

ایک نجی نیوز چینل سے گفتگو میں رانا ثنا اللہ نے کہا کہ جوڈیشل کمیشن میں فیصلے میرٹ پر ہو رہے ہیں اور انہی فیصلوں کی روشنی میں چیف جسٹس یحییٰ آفریدی اور دیگر ججز کی تعیناتیاں عمل میں آئی ہیں۔ان کا کہنا تھا کہ اگر کوئی جج ایک مخصوص حلقے یا لابی کی مرضی کے بغیر تعینات ہوا ہے تو کیا وہ اس بنیاد پر غلط ہو گیا؟
ججز کی سینیارٹی کی بنیاد پر ہی اعلیٰ عہدوں کا فیصلہ کیا گیا ہے اور سینیئر ترین جج ہی چیف جسٹس کے لیے سب سے موزوں سمجھے گئے ہیں۔رانا ثنا اللہ نے مزید کہا کہ آج جو لوگ خط لکھنے کو درست سمجھ رہے ہیں، وہ ماضی میں جسٹس قاضی فائز عیسیٰ کے خطوط کو ناپسند کرتے تھے، حالانکہ اس وقت بھی عدالتی آزادی کا معاملہ زیر بحث تھا۔ان کا کہنا تھا کہ 2024 کے انتخابات پر جو اعتراضات اب اٹھائے جا رہے ہیں، ویسے ہی تحفظات ہمیں 2018 کے الیکشن کے حوالے سے تھے۔ اگر اس وقت تحریک انصاف نے صوبائی اسمبلیاں تحلیل نہ کی ہوتیں تو 9 مئی جیسے افسوسناک واقعات پیش نہ آتے۔ انہوں نے کہا کہ اگر حکومت کو مزید دو یا تین سال تک تسلسل سے کام کرنے دیا جائے، تو ملک کو معاشی بحران سے نکالا جا سکتا ہے۔