ایک غیر ملکی خبر رساں ایجنسی کے مطابق امریکی صدر ٹرمپ نے منگل کے روز اعلان کیا کہ اسرائیل حماس کے ساتھ 60 روزہ جنگ بندی کے لیے ضروری شرائط پر رضامند ہو گیا ہے۔یہ پیش رفت ان کے نمائندوں اور اسرائیلی حکام کے درمیان ہونے والی ملاقات کے بعد سامنے آئی ہے۔دریں اثنا، اسرائیلی وزیر اعظم بنجمن نیتن یاہو نے پہلی بار ٹرمپ کے اعلان کا جواب دیتے ہوئے کہا کہ اسرائیل حماس کو مکمل طور پر ختم کر دے گا۔نیتن یاہو نے کہا کہ حماس نہیں ہوگی، ہم ماضی میں واپس نہیں جا رہے ہیں، یہ سب ختم ہو گیا ہے۔”

حماس نے اپنے بیان میں کہا ہے کہ وہ مصر اور قطر کے ذریعے موصول ہونے والی تازہ پیشکشوں پر غور کر رہی ہے اور ایک معاہدے کی کوشش کر رہی ہے جو جنگ کے خاتمے اور غزہ سے اسرائیلی افواج کے انخلاء کو یقینی بنائے۔دونوں اطراف کے بیانات سے ظاہر ہوتا ہے کہ ان کی پوزیشنیں اب بھی سخت ہیں، جو کسی ممکنہ سمجھوتے کی راہ ہموار نہیں کرتی۔

دوسری جانب غزہ میں صہیونی فوج نے انڈونیشیا کے ہسپتال کے ڈائریکٹر مروان السلطان کو ان کی اہلیہ اور بچوں سمیت شہید کر دیا۔ وزارت صحت کا کہنا ہے کہ انڈونیشیا کے ایک ہسپتال کے ڈائریکٹر ڈاکٹر مروان السلطان کو غزہ میں اسرائیلی فضائی حملے میں ان کے گھر پر ان کے اہل خانہ سمیت شہید کر دیا گیا۔ اسرائیلی فوج نے بدھ کے روز غزہ شہر میں ایک رہائشی عمارت پر حملہ کیا جس میں مزید 67 فلسطینی شہید  ہو گئے۔

رپورٹ کے مطابق اسرائیلی فوج نے فلسطینیوں کو فوری طور پر غزہ کے علاقے خان یونس کو خالی کرنے کا حکم دیتے ہوئے کہا ہے کہ پوری طاقت سے کارروائی کی جائے گی اور جہاں کہیں سے بھی راکٹ فائر کیے جائیں گے وہاں سے حملہ کیا جائے گا۔