اردوورلڈ کینیڈا ( ویب نیوز)پاک فوج کے شعبہ تعلقات عامہ کے مطابق سیکورٹی فورسز کے قافلے پر دیسی ساختہ بم حملے میں 2 اہلکار شہید ہوگئے۔
پاک فوج کے شعبہ تعلقات عامہ کے مطابق شمالی وزیرستان کے علاقے رزمک میں قافلے پر بم دھماکہ ہوا، دھماکے کے نتیجے میں 2 جوان شہید ہوگئے۔
آئی ایس پی آر کے مطابق دھماکے میں شہید ہونے والے لانس نائیک احسان بادشاہ کی عمر 33 سال تھی اور ان کا تعلق ضلع کرک سے تھا جب کہ لانس نائیک ساجد حسین کی عمر 30 سال تھی اور ان کا تعلق ضلع کرم سے تھا۔
پاک فوج کے شعبہ تعلقات عامہ کا کہنا ہے کہ علاقے میں دہشت گردوں کے خاتمے کے لیے آپریشن جاری ہے، سیکورٹی فورسز دہشت گردی کی لعنت کے خاتمے کے لیے پرعزم ہیں، ہمارے بہادر جوانوں کی ایسی قربانیاں ہمارے عزم کو مزید مضبوط کرتی ہیں۔