اردو ورلڈ کینیڈا ( ویب نیوز ) سابق امریکی صدر ڈونلڈ ٹرمپ کا اپنے اوپر حملے سے متعلق بیان سامنے آگیا، انہوں نے کہا کہ گولی میرے کان کے اوپر لگی۔سابق صدر پنسلوانیا کے شہر بٹلر میں ایک انتخابی ریلی سے خطاب کر رہے تھے کہ اچانک فائرنگ شروع ہو گئی، ایک گولی ان کے کان میں لگی۔صدارتی امیدوار ٹرمپ فوراً اسٹیج پر جھک گئے جبکہ ان کی حفاظت پر مامور سیکیورٹی اہلکاروں نے انہیں چاروں اطراف سے گھیر لیا اور حفاظتی باڑ میں محفوظ مقام پر منتقل کردیا۔
امریکی میڈیا کے مطابق حملہ آور مارا گیا ہے جب کہ بعض میڈیا ہاؤسز نے بتایا ہے کہ ایک ووٹر ہلاک اور دو افراد شدید زخمی ہوئے ہیں۔سابق صدر ڈونلڈ ٹرمپ نے سوشل میڈیا پر اپنی پوسٹ میں لکھا کہ مجھے فوری طور پر معلوم ہوا کہ کچھ غلط ہے، مجھے کان کے اوپر گولی ماری گئی، انہوں نے فوری کارروائی پر سیکیورٹی اہلکاروں کا شکریہ ادا کیا اور ریلی میں شریک ایک شخص کی ہلاکت پر دکھ کا اظہار کیا۔
