اردو ورلڈ کینیڈا ( ویب نیوز ) شمال مشرقی فرانس میں گھر میں آگ لگنے سے دم گھٹنے سے ماں اور سات بچے ہلاک ہو گئے۔ غیر ملکی خبر رساں ادارے کے مطابق گھر میں آگ لگنے کا واقعہ پیرس سے 82 کلومیٹر دور شہر شارلیمین میں پیش آیا۔

رپورٹس میں بتایا گیا کہ گھر میں رات کے وقت آگ اس وقت لگی جب سب سو رہے تھے اور جلد ہی گراؤنڈ فلور سے دھواں پورے گھر میں پھیل گیا۔گھر میں آگ لگنے کی اطلاع پڑوسیوں نے دی اور ریسکیو آپریشن میں 80 فائر فائٹرز نے حصہ لیا۔

مقامی پراسیکیوٹر نے تصدیق کی کہ گھر میں آگ کپڑے کے ڈرائر سے لگی اور ماں اور 7 بچے دم گھٹنے سے ہلاک ہوئے۔ بچوں کی عمریں 2 سے 14 سال کے درمیان ان میں 5 لڑکیاں اور 2 لڑکے شامل ہیں۔

حکام کے مطابق بچوں کو بچانے کی کوشش میں باپ بری طرح جھلس گیا، جسے تشویشناک حالت میں اسپتال منتقل کردیا گیا ہے۔حکام کا کہنا ہے کہ واقعے کی تحقیقات شروع کردی گئی ہیں۔