اردو ورلڈ کینیڈا ( ویب نیوز ) بھارت میں اپنی نوعیت کا ایک انوکھا واقعہ سامنے آیا ہے جس میں ایمبولینس کی اسپیڈ بریکر سے ٹکرانے کے بعد مردہ قرار دیا جانے والا شخص دوبارہ زندہ ہو گیا۔

مہاراشٹر کے شہر کولہاپور میں ایک 65 سالہ شخص جسے مردہ قرار دینے کے بعد ایمبولینس کے ذریعے گھر لے جایا جا رہا تھا کہ اسپیڈ بریکر سے گزرتے ہی ایمبولینس نے دھکا دے کر زندہ کر دیا۔رپورٹ میں کہا گیا ہے کہ یہ واقعہ 16 دسمبر کو پیش آیا ۔بھارتی میڈیا کے مطابق 65 سالہ پانڈورنگ کو گزشتہ ماہ دل کا دورہ پڑنے پر ہسپتال لے جایا گیا جہاں ڈاکٹروں نے انہیں مردہ قرار دے دیا۔ تاہم، جب ایمبولینس ہسپتال سے گھر جاتے ہوئے اسپیڈ بریکر سے گزری تو خاندان والے پانڈورنگ کی انگلیاں حرکت کرتے دیکھ کر حیران رہ گئے۔یہ دیکھ کر ایمبولینس کو فوراً دوسرے اسپتال لے جایا گیا۔ہسپتال پہنچنے پر انہیں انتہائی نگہداشت کے وارڈ میں داخل کرایا گیا۔ حیرت کی بات یہ ہے کہ ان کی سانسیں ٹھیک ہوگئیں اور اب 15 دن کے علاج کے بعد انہیں اسپتال سے ڈسچارج کردیا گیا ہے۔ابتدائی طور پر پانڈورنگ کو مردہ قرار دینے والے اسپتال نے ابھی تک اس واقعے پر کوئی بیان جاری نہیں کیا ہے۔