اردو ورلڈ کینیڈا ( ویب نیوز)پنجاب کے مختلف علاقوں میں اتوار کی صبح گھنی دھند چھائی رہی جس سے علاقائی اور قومی شاہراہوں اور موٹر ویز پر ٹریفک کی آمدورفت محدود ہو گئی۔لاہور سے شیخوپورہ جانے والی ایم ٹو کو شدید دھند کے باعث بند کر دیا گیا۔

ترجمان موٹروے پولیس نے بتایا کہ لاہور ملتان موٹروے فیض پور سے سمندری تک بھی بند کردی گئی ہے جبکہ لاہور سیالکوٹ موٹروے ایم 11، شیرشاہ انٹرچینج سے ترنڈہ محمد پناہ تک ایم 5 اور شیرشاہ سے گڈو انٹرچینج تک ایم 5 بھی بند ہے۔

راجن پور کی انڈس ہائی وے پر بھی حد نگاہ صفر ہوگئی۔
عوام کی حفاظت اور محفوظ سفر کو یقینی بنانے کے لیے موٹر ویز کو بند کر دیا گیا تھا۔ موٹروے پولیس کے ترجمان نے کہا کہ عوام تیز رفتاری سے گریز کریں اور اشارے کی لائٹس آن کرنے کے ساتھ ساتھ دوسری گاڑیوں سے مناسب فاصلہ برقرار رکھیں۔

مدد کی صورت میں روڈ یوزرز کسی بھی معلومات کے لیے ہیلپ لائن 130 اور موٹروے پولیس ہمسفر ایپ پر رابطہ کر سکتے ہیں۔
ادھر محکمہ موسمیات نے بلوچستان میں آئندہ 24 گھنٹوں کے دوران موسم خشک اور سرد رہنے کی پیشگوئی کی ہے۔