اردو ورلڈ کینیڈا ( ویب نیوز)بھارتی میڈیا نے رپورٹ کیا کہ بھارتی ریاست اتر پردیش میں شادی کی تقریب میں "رسگلوں” کی قلت کے باعث لڑائی جھگڑے کے بعد ایک 22 سالہ نوجوان ہلاک اور پانچ زخمی ہو گئے ۔

یہ واقعہ بدھ کی رات بھارتی قصبے اتمد پور میں شادی کی تقریب میں پیش آیا۔ مقامی پولیس کے مطابق رسگلہ کی مٹھائی کی قلت کے باعث جھگڑا ہوا۔

مقامی پولیس افسر روی کمار گپتا نے بتایا کہ مٹھائی کی قلت پر جھگڑا سنگین لڑائی میں بدل گیا اور ایک شخص نے حاضرین پر چاقو سے حملہ کر دیا۔

گپتا نے بتایا کہ 22 سالہ سنی، لڑائی کے دوران شدید زخمی ہونے کی وجہ سے مقامی ہسپتال میں دم توڑ گیا اس کی لاش کو پوسٹ مارٹم کے لیے بھیج دیا گیا۔

حملے میں زخمی ہونے والے پانچ افراد کو مقامی اسپتال منتقل کیا گیا جہاں ان کا علاج کیا گیا۔ متاثرہ کے اہل خانہ کی جانب سے شکایت درج کروائی گئی ہے تاہم ابھی تک کوئی گرفتاری عمل میں نہیں آئی ہے۔

گپتا نے کہا، "متاثرہ کے خاندان کی شکایت کے مطابق مزید کارروائی کی جائے گی۔”