اردوورورلڈ کینیڈا( ویب نیوز ) لاہور ہائیکورٹ کے واضح حکم کے باوجود انتخابی شیڈول جاری نہ کرنے پر گورنر پنجاب اور الیکشن کمیشن کے خلاف توہین عدالت کی درخواست دائر کر دی گئی۔
لاہور ہائیکورٹ کے صوبہ پنجاب میں انتخابی شیڈول جاری کرنے کے واضح حکم کے باوجود انتخابی شیڈول جاری نہ کرنے پر گورنر پنجاب بلیغ الرحمان اور الیکشن کمیشن کے خلاف ہائیکورٹ میں توہین عدالت کی درخواست دائر کر دی گئی۔
شہری منیر احمد کی جانب سے اظہر صدیق ایڈووکیٹ کی ثالثی میں دائر درخواست میں موقف اختیار کیا گیا ہے کہ لاہور ہائی کورٹ نے پنجاب میں فوری الیکشن شیڈول جاری کرنے کا حکم دیا تھا اور اتوار کی رات تک انتخابی شیڈول دینا لازمی قرار دیا تھا۔ تاہم عدالتی حکم کے باوجود الیکشن کی تاریخ نہیں دی گئی۔
درخواست میں مزید کہا گیا ہے کہ آئین کے مطابق 90 دن میں انتخابات کرانا لازمی ہے جس کے مطابق 60 دن رہ گئے ہیں اور انتخابی شیڈول جاری نہ ہونے سے بحران پیدا ہونے کا خطرہ ہے
درخواست میں استدعا کی گئی کہ عدالتی حکم کی خلاف ورزی پر گورنر پنجاب، چیف الیکشن کمشنر اور دیگر کے خلاف توہین عدالت کی کارروائی کی جائے۔
