اردوورلڈ کینیڈا ( ویب نیوز )کاروبار کے آغاز پر ہی انٹربینک مارکیٹ میں ڈالر کی قیمت میں کمی جاری ہے۔انٹربینک ڈالر ٹریڈنگ کے آغاز پر امریکی کرنسی کی قیمت میں 81 پیسے کی کمی دیکھی گئی ہے جس کے بعد انٹربینک مارکیٹ میں ڈالر 276 روپے 60 پیسے پر ٹریڈ کر رہا ہے۔

یاد رہے کہ گزشتہ روز انٹربینک مارکیٹ میں ڈالر کی قیمت میں 1.98 روپے کا اضافہ ہوا تھا جب کہ لین دین 277.41 پر بند ہوا تھا۔

واضح رہے کہ منگل کو انٹربینک میں بھی ڈالر کی قیمت میں ساڑھے 10 روپے کی کمی دیکھی گئی تھی۔

دوسری جانب پاکستان اسٹاک ایکسچینج میں آج کاروبار کا آغاز مثبت انداز میں ہوا اور ٹریڈنگ کے دوران 100 انڈیکس کے پوائنٹس میں اضافہ دیکھا جارہا ہے۔

شیئر مارکیٹ میں کاروبار کے دوران 100 انڈیکس 172 پوائنٹس کے اضافے سے 43 ہزار 700 کی سطح پر پہنچ گیا۔

حکومت پاکستان اور آئی ایم ایف کے درمیان اسٹاف لیول کے معاہدے کے بعد سے پاکستان اسٹاک ایکسچینج میں مثبت رجحان دیکھا جارہا ہے۔

یاد رہے کہ دو روز قبل ایک ہی دن میں 100 انڈیکس میں 2400 پوائنٹس اضافے کا نیا ریکارڈ قائم ہوا تھا، انڈیکس تین سال بعد 43 ہزار 900 تک پہنچ گیا تھا۔