103
اردو ورلڈ کینیڈا ( ویب نیوز ) ایران میں ایک طاقتور شیعہ عالم، آیت اللہ عباس علی سلیمانی مسلح حملے میں جان کی بازی ہار گئے۔
ایران کے سرکاری میڈیا کے مطابق 75 سالہ آیت اللہ عباس علی سلیمانی کو شمالی صوبے مازندران کے شہر بابولسر میں ایک حملہ آور نے گولی مار کر قتل کر دیا۔
سیکیورٹی اہلکاروں نے قاتل کو گرفتار کرلیا۔قتل کی وجہ تاحال معلوم نہیں ہوسکی ہے جبکہ گرفتار ملزمان کی شناخت ظاہر نہیں کی گئی۔ آیت اللہ عباس علی سلیمانی ایک طاقتور عالم دین ہیں جو صوبہ اصفہان کے مرکزی شہر کاشان اور جنوب مشرقی صوبہ سیستان بلوچستان کے زاہدان میں بھی نماز جمعہ کی امامت کرتے رہے ہیں۔
وہ اس سے قبل آیت اللہ علی خامنہ ای کے نمائندے بھی تھے اور ملک کے سپریم لیڈر کے انتخاب کے لیے کونسل کے رکن بھی تھے۔ وہ سپریم لیڈر آیت اللہ خامنہ ای کے بہت قریب سمجھے جاتے تھے۔واضح رہے کہ سپریم لیڈر خامنہ ای کے ایک اور نمائندے آیت اللہ یوسف طباطبائی پر بھی گزشتہ سال اصفہان میں چاقو سے حملہ کیا گیا تھا تاہم وہ بچ گئے تھے۔ اسی طرح گزشتہ سال اپریل میں صوبہ مشہد کے شمال مشرقی شہر میں ایک حملے میں دو علما ہلاک اور ایک شدید زخمی ہو گیا تھا۔
