اردو ورلڈ کینیڈا ( ویب نیوز ) سلامتی کونسل نے افغان خواتین کو اقوام متحدہ کے لیے کام کرنے سے روکنے پر طالبان کے خلاف قرارداد منظور کرلی۔

اقوام متحدہ کی سلامتی کونسل میں متفقہ طور پر منظور کی گئی قرارداد میں خواتین پر پابندیاں عائد کرنے پر طالبان کی مذمت کی گئی۔

یہ بھی پڑھیں

طالبان نے اقوام متحدہ کی افغان خواتین کارکنوں کو کام کرنے سے روک دیا

قرارداد میں طالبان سے مطالبہ کیا گیا کہ وہ خواتین کے حقوق کے خلاف کریک ڈاؤن فوری طور پر بند کریں۔متحدہ عرب امارات اور جاپان کی طرف سے مشترکہ طور پر پیش کی گئی ایک قرارداد میں طالبان کی جانب سے خواتین پر اقوام متحدہ کے لیے کام کرنے پر پابندی کو "غیر معمولی اور انسانی حقوق کی خلاف ورزی” قرار دیا گیا ہے۔طالبان نے رواں ماہ اقوام متحدہ کے لیے کام کرنے والی افغان خواتین پر پابندیاں عائد کر دی تھیں۔ زیادہ تر خواتین امدادی گروپوں کے لیے کام کر رہی تھیں۔