اردو ورلڈ کینیڈا ( ویب نیوز )پنجاب میں عام انتخابات ملتوی کرنے سے متعلق کیس کے فیصلے پر سپریم کورٹ کے 3 رکنی بینچ کے خلاف قومی اسمبلی میں قرارداد منظور کر لی گئی۔

بلوچستان سے رکن قومی اسمبلی خالد مگسی نے سپریم کورٹ کے 3 رکنی بینچ کے فیصلے کو مسترد کرتے ہوئے قرارداد ایوان میں جمع کرادی۔

قرارداد کے مطابق ایوان نے سیاسی معاملات میں بے جا عدالتی مداخلت پر تشویش کا اظہار کیا، حالیہ اقلیتی فیصلے سے ملک میں سیاسی عدم استحکام پیدا ہو رہا ہے، وفاقی اکائیوں میں تقسیم کی راہ ہموار ہوئی ہے، ایوان سیاسی و معاشی استحکام کے لیے ضروری ہے۔

قرارداد میں کہا گیا کہ 3 ججوں کی بنچ کے اقلیتی فیصلے کو مسترد کرتے  ہیں، ایوان نے آئین کے آرٹیکل 63 اے کی غلط تشریح اور سپریم کورٹ کے فیصلے کے ذریعے اس کی دوبارہ تحریر پر شدید تشویش کا اظہار کیا۔

واضح رہے کہ اس سے قبل وفاقی کابینہ بھی الیکشن سے متعلق سپریم کورٹ کے فیصلے کو پارلیمنٹ کی قرارداد سے متصادم قرار دے کر مسترد کر چکی ہے۔