اردو ورلڈ کینیڈا ( ویب نیوز )آئی ایس پی آرکی جانب سے جاری ہونے والے بیان میں کہا گیا ہے کہ پاک فوج اور دہشت گردوں کے درمیان فائرنگ کے تبادلے میں پاک فوج کے ایک جوان نے جام شہادت نوش کیا۔
فوج کے میڈیا ونگ کے مطابق، سیکورٹی فورسز نے 7 نومبر کو ضلع خیبر کے علاقے شکاس میں مشترکہ انٹیلی جنس پر مبنی آپریشن کیا۔
آپریشن کے دوران فورسز اور دہشت گردوں کے درمیان شدید فائرنگ کا تبادلہ ہوا۔
آپریشن کے دوران دہشت گرد بھی مارا گیا جس سے بڑی تعداد میں اسلحہ اور گولہ بارود بھی برآمد ہوا، بیان میں مزید کہا گیا کہ دہشتگرد سیکیورٹی فورسز کے خلاف دہشت گردی کی کارروائیوں اور ٹارگٹ کلنگ اور بھتہ خوری میں سرگرم رہا۔
فائرنگ کے تبادلے کے دوران 28 سالہ سپاہی سلیم خان، جو ٹوپی، صوابی کے رہائشی تھے، نے بہادری سے لڑتے ہوئے شہادت کو گلے لگا لیا۔
دہشت گردوں اور سیکورٹی فورسز کے درمیان فائرنگ کے تبادلے میں اہم دہشت گرد کمانڈر لیاقت علی عرف شاہین مارا گیا۔
