اردوورلڈ کینیڈا( ویب نیوز)وزیراعظم شہباز شریف کی کوششیں رنگ لائیں، شام میں پھنسے 318 پاکستانیوں کو لے کر خصوصی طیارہ پاکستان پہنچ گیا۔

پاکستانی بیروت سے چارٹرڈ طیارے کے ذریعے اسلام آباد پہنچے۔ وفاقی وزیر احسن اقبال اور دیگر حکومتی نمائندوں نے ان کا استقبال کیا، پاکستانیوں کو گلدستے پیش کیے اور ان کی خیریت دریافت کی۔
شام کی حالیہ صورتحال کے پیش نظر پاکستانی وہاں پھنسے ہوئے تھے۔ وزیراعظم شہباز شریف نے اپنے لبنانی ہم منصب سے رابطہ کرکے پاکستانیوں کی واپسی کی راہ ہموار کی۔
وفاقی وزیر احسن اقبال نے میڈیا سے گفتگو کرتے ہوئے کہا کہ پاکستانی دنیا میں جہاں بھی ہو تنہا نہیں ہوگا۔ ہم ایک قوم ہیں۔ قوم کے دکھ اور خوشیاں بانٹیں۔ پاکستانیوں کی بحفاظت وطن واپسی پر ہم لبنانی وزیراعظم کے مشکور ہیں۔