اردوورلڈ کینیڈا( ویب نیوز)امریکی قومی سلامتی کونسل کے ترجمان جان کربی نے غزہ پر اسرائیل کے حملوں کو درست قرار دیا۔میڈیا رپورٹس کے مطابق رفح پناہ گزین کیمپ پر اسرائیلی فوج کے وحشیانہ حملے پر امریکی قومی سلامتی کونسل کے ترجمان جان کربی نے کہا کہ اسرائیل کو حماس کے خلاف کارروائی کا حق حاصل ہے۔
ایک بیان میں جان کربی نے کہا کہ ہمیں یقین ہے کہ رفح حملے میں حماس کے دو سینئر ارکان مارے گئے تھے اور حماس کے دونوں ارکان اسرائیلی شہریوں پر حملوں کے ذمہ دار تھے۔انہوں نے کہا کہ اسرائیل شہریوں کے تحفظ کے لیے ہرممکن احتیاطی تدابیر اختیار کرے، اسرائیلی فوج سے رابطے میں ہیں، اسرائیل رفح حملے کی تحقیقات کر رہا ہے۔
دوسری جانب فلسطینیوں سے اظہار یکجہتی کے لیے پیرس، نیویارک، بارسلونا، تیونس اور مانچسٹر سمیت دنیا کے مختلف شہروں میں مظاہرے کیے گئے۔ مظاہرین نے عالمی برادری سے اسرائیل پر سخت پابندیوں کا مطالبہ بھی کیا۔واضح رہے کہ گزشتہ رات رفح پناہ گزین کیمپ پر اسرائیلی فوج کے حملے میں خواتین اور بچوں سمیت 75 سے زائد فلسطینی شہید ہوگئے تھے۔ زیادہ تر لوگ موقع پر ہی دم توڑ گئے۔
غزہ پر سات اکتوبر سے شروع ہونے والی اسرائیلی جارحیت میں سات ماہ سے زائد عرصے میں ہلاک ہونے والے فلسطینیوں کی تعداد 36 ہزار سے زائد ہو گئی ہے جب کہ زخمیوں کی تعداد 81 ہزار تک پہنچ گئی ہے۔
