اردوورلڈکینیڈا( ویب نیوز)ڈاکٹر عافیہ صدیقی کی رہائی اور وطن واپسی سے متعلق مقدمہ 29 اکتوبر کو اسلام آباد ہائی کورٹ کے لارجر بینچ میں سنا جائے گا۔ عدالت کے رجسٹرار آفس نے کیس کی سماعت کے لیے کاز لسٹ جاری کر دی ہے۔

ہائی کورٹ کی جانب سے چار رکنی لارجر بینچ تشکیل دیا گیا ہے جس کی سربراہی جسٹس ارباب محمد طاہر کریں گے، جب کہ بینچ میں جسٹس خادم حسین سومرو، جسٹس اعظم خان اور جسٹس راجہ انعام امین منہاس شامل ہوں گے۔

گزشتہ سماعت ایک جج کی عدم دستیابی کے باعث مؤخر کر دی گئی تھی۔ یکم ستمبر کو جسٹس انعام امین منہاس نے کیس کی فائل چیف جسٹس کو بھیج کر نئے بینچ کی تشکیل کی سفارش کی تھی۔

اس سے قبل یہ مقدمہ جسٹس سردار اعجاز اسحاق خان کے روبرو زیرِ سماعت تھا۔ انہوں نے گزشتہ سماعت میں وزیراعظم اور کابینہ کے ارکان کو توہینِ عدالت کے نوٹسز جاری کیے تھے۔ بعد ازاں ٹیکس سے متعلق مقدمات کے لیے انہیں اسپیشل ڈویژن بینچ میں تعینات کیے جانے پر ان کے دیگر کیسز دوسری عدالتوں کو منتقل کر دیے گئے۔