اردو ورلڈکینیڈا ( ویب نیوز ) گوگل میپس کے بتائے گئے راستے پر جانے والی گاڑی زیر تعمیر پل سے دریا میں جاگری۔
حادثہ کے نتیجے میں 3 افراد ہلاک ہوگئے۔ گلوبل پوزیشننگ سسٹم (جی پی ایس) کا استعمال کرتے ہوئے بریلی سے داتا گنج جانے والی کار ضلع فرید پور میںزیر تعمیر پل سے 50 فٹ نیچے دریا میں گر گئی۔حادثے میں دو بھائیوں اور ایک نوجوان کی موت ہو گئی۔ مرنے والوں میں فرخ آباد کے رہنے والے امیت اور وویک کمار شامل ہیں جبکہ پولیس تیسرے مقتول کی شناخت کرنے کی کوشش کر رہی ہے۔پولیس کے مطابق رواں سال سیلاب کے باعث پل کا اگلا حصہ دریا میں گر گیا تاہم گوگل میپس میں تبدیلی کو اپ ڈیٹ نہیں کیا گیا ۔ گاؤں والوں کی طرف سے اطلاع ملنے کے بعد پولیس اور امدادی ٹیموں نے گاڑی کو رام گنگا ندی سے باہر نکالا، جس میں سوار تینوں کی موت ہو گئی تھی۔
واقعہ کی تحقیقات کرتے ہوئے اسسٹنٹ کمشنر آشوتوش شیوم نے کہا کہ پل زیر تعمیر ہونے کے باوجود اس میں حفاظتی باڑ یا کسی خطرے کا نشان نہیں تھا جس کی وجہ سے یہ جان لیوا حادثہ پیش آیا۔ انہوں نے کہا کہ اگر پل پر مناسب حفاظتی اقدامات کئے جاتے تو یہ المناک سانحہ رونما نہ ہوتا۔اہل خانہ اور دیہاتیوں نے حادثے کا ذمہ دار انتظامیہ کو ٹھہراتے ہوئے ذمہ داروں کے خلاف کارروائی کا مطالبہ کیا ہے۔
