اردوورلڈکینیڈا(ویب نیوز)خیبرپختونخوا میں سکیورٹی فورسز نے دو علیحدہ کارروائیوں کے دوران بھارتی حمایت یافتہ خوارج کے 24 دہشت گرد ہلاک کر دیے۔ پاک فوج کے شعبہ تعلقات عامہ (آئی ایس پی آر) کے مطابق پہلی کارروائی ضلع اورکزئی میں خوارج کی موجودگی کی اطلاع پر کی گئی، جس میں فوجی دستوں نے مؤثر انداز میں ان کے ٹھکانے کو نشانہ بنایا اور 14 دہشت گرد مار دیے۔

دوسری کارروائی ضلع خیبر میں انجام پائی، جہاں انٹیلی جنس کی بنیاد پر ہونے والے آپریشن میں فائرنگ کے تبادلے کے دوران مزید 10 خوارج ہلاک ہوئے۔

آئی ایس پی آر نے بتایا کہ علاقے میں اب بھی ایسے عناصر موجود ہیں جو بھارتی سرپرستی میں کام کر رہے ہیں، اور ان کے خاتمے کے لیے کلیئرنس آپریشنز جاری ہیں۔

پاک فوج کے مطابق قومی ایکشن پلان اور وفاقی ایپکس کمیٹی سے منظور شدہ وژن "عزمِ استحکام” کے تحت، سکیورٹی فورسز اور قانون نافذ کرنے والے ادارے ملک میں غیر ملکی حمایت یافتہ دہشت گرد عناصر کے مکمل خاتمے تک انسداد دہشت گردی کی مہم جاری رکھیں گے۔