اردو ورلڈ کینیڈا ( ویب نیوز ) نگراں وزیراعظم انوار الحق کاکڑ نے کہا ہے کہ افغان طالبان اچھی طرح جانتے ہیں کہ کالعدم تحریک طالبان پاکستان کے لوگ کہاں کہاں پاکستان کے خلاف کارروائیاں کر رہے ہیں۔
ٹی ٹی پی وسطی ایشیائی ریاستوں میں نہیں بلکہ افغان سرزمین پر موجود ہے۔نگران وزیراعظم نے نجی ٹی وی سے گفتگو کرتے ہوئے کہا کہ دو سال قبل کابل میں ہونے والے ان مذاکرات میں دراصل ٹی ٹی پی کے لوگ شریک تھے۔انہوں نے کہا کہ اب یہ افغان طالبان پر منحصر ہے کہ وہ ٹی ٹی پی کے لوگوں کو ہمارے حوالے کریں یا ان کے خلاف کارروائی کریں۔
وزیر اعظم نے مزید کہا کہ یہ بات قابل قبول نہیں کہ پاکستان کے خلاف کارروائیاں افغان سرزمین سے کی جائیں اور افغان طالبان تماشا دیکھتے رہیں۔وزیراعظم نے کہا کہ آرمی چیف سے ملاقات میں تمام مکاتب فکر کے علماء نے ٹی ٹی پی کے حوالے سے موجودہ حکومتی پالیسی کی حمایت کی ہے۔
