ادو ورلڈ کینیڈا ( ویب نیوز ) مشکلات میں گری پاکستانی معیشت کو مزید مشکلات کا سامنا ورلڈ بینک نے قرضوں کی منظوری موخر کر دی عالمی بینک نے پاکستان کے لیے 1 ارب 10 کروڑ ڈالر کے قرضوں کی منظوری موخر کردی۔عالمی بینک نے درآمدات پر ‘ فلڈ لیوی عائد کرنے کی بھی مخالفت کی ہے۔واضح رہے کہ عالمی بینک کا پائیدار معیشت کے لیے 450 ملین ڈالر کا قرضہ تھا، اس کے علاوہ سستی توانائی کے لیے 600 ملین ڈالر کا قرضہ بھی موخر کر دیا گیا ہے۔
عالمی بینک کے ترجمان نے کہا کہ مالی سال 2024 میں پائیدار معیشت کے لیے بورڈ ڈسکشن متوقع ہے، جبکہ سستی توانائی کے لیے قرض کی منظوری بھی اگلے مالی سال میں دی جا سکتی ہے اس حوالے سے امریکہ کے ترجمان محکمہ خارجہ نے کہا کہ پاکستان عالمی اقتصادی اداروں سے رابطے میں ہے۔
نیڈ پرائس نے کہا کہ پاکستان کو بہتر معاشی پوزیشن میں دیکھنا چاہتے ہیں، جہاں بھی ممکن ہو پاکستان کو سپورٹ کریں گے، دو طرفہ رابطوں میں ان موضوعات پر بات ہوتی ہے۔ترجمان امریکی محکمہ خارجہ کا کہنا تھا کہ پاکستان کے ساتھ تکنیکی نکات پر بات ہوئی، وزارت خارجہ، خزانہ، وائٹ ہاؤس اور دیگر سے بھی پاکستان کے میکرو اکنامک استحکام پر بات ہوئی۔
