اردوورلڈ کینیڈا ( ویب نیوز)ملک بھر کے تعلیمی بورڈز میں پاسنگ مارکس کم از کم 40 کرنے پر اتفاق کیا گیا ہے۔ملک کے تعلیمی بورڈز کے چاروں چیئرمینوں کی کمیٹی کا دو روزہ اجلاس ہوا جس میں 21 نکاتی ایجنڈے پر غور کیا گیا اور اہم امور پر اتفاق کیا گیا۔

اجلاس میں کمیٹی نے پاسنگ مارکس کو کم از کم 40 فیصد کرنے پر اتفاق کیا ہے جبکہ میٹرک اور انٹرمیڈیٹ کے مسلم طلباء کے لیے قرآن کی تعلیم کو لازمی قرار دینے پر بھی اتفاق کیا گیا ہے۔
بورڈز کے چیئرمینوں نے اس بات پر بھی اتفاق کیا ہے کہ ملک بھر میں یکساں رزلٹ کارڈ متعارف کرایا جائے گا اور امتحانات کا شیڈول مارچ اپریل کی بجائے مئی اور جون میں منعقد کرنے پر اتفاق کیا گیا ہے۔
اس کے علاوہ اجلاس میں رواں سال کے لیے انٹر بورڈ سپورٹس کمیٹی کے چیئرمین کی تقرری کا فیصلہ کیا گیا ہے اور بلوچستان بورڈ رواں سال انٹربورڈ سپورٹس کمیٹی کا چیئرمین ہوگا۔