اردو ورلڈ کینیڈا ( ویب نیوز )گو ٹرانزٹ کارکنوں نے آج میٹرولنکس کے ساتھ ایک معاہدہ کیا اور اس کے ساتھ ہی چار روزہ ہڑتال بھی ختم ہوگئی۔
اس موقع پر میٹرولنکس کا کہنا تھا کہ ہفتے کو بس سروس شروع ہونے کا امکان ہے۔
گو بس کے کارکنان بشمول ڈرائیور اور اسٹیشن اٹینڈنٹ پیر سے ہڑتال پر تھے۔
جس کی وجہ سے جہاں بس سروس درہم برہم ہوئی وہیں بسوں میں سفر کرنے والے ہزاروں افراد کی روزمرہ زندگی بھی متاثر ہوئی۔
معاہدے کی بات چیت جمعہ کو شروع ہونے کی امید تھی لیکن املگامیٹڈ ٹرانزٹ یونین (اے ٹی یو) نے ٹرانزٹ آپریٹر پر بات چیت میں تاخیر کا الزام لگایا۔
اس کے بعد جمعرات کو مذاکرات دوبارہ شروع ہوئے۔میٹرولنکس کی ترجمان این میری ایکنز نے کہا کہ وہ یونین کے ساتھ ایک معاہدے پر پہنچنے پر خوش ہیں۔
جہاں تک بس سروس جمعہ کو کیوں شروع نہیں ہوئی، ایکنز نے کہا کہ ہمیں اپنے عملے کی واپسی کی ضرورت ہے۔ ہم چاہتے تھے کہ بسیں اپنے مقام پر واپس جائیں اور یہ بھی چاہتے تھے کہ سروس جاری رہے، ہم حفاظت کو بھی یقینی بنانا چاہتے تھے۔