اردو ورلڈ کینیڈا ( ویب نیوز ) البرٹا کے ایک جج نے چھ افراد کو توہین عدالت کا مرتکب قرار دیا ہے کیونکہ انہوں نے 2023 میں یونائیٹڈ کنزرویٹو پارٹی کو مبینہ غیر قانونی سیاسی عطیات کی تحقیقات کے سلسلے میں دیے گئے انٹرویوز میں شرکت نہیں کی۔
جج پیٹر میکالی شین کی جانب سے جاری کیے گئے فیصلے میں کہا گیا ہے کہ صوبائی انتخابات کمشنر نے گزشتہ سال بہار سے پارٹی کو دیے گئے عطیات کی جانچ شروع کی تھی، جن کے بارے میں شبہ ہے کہ یہ رقم عطیہ کنندگان کی اپنی نہیں تھی۔فیصلے میں واضح نہیں کیا گیا کہ توہین عدالت قرار دیے گئے افراد تحقیقات کے مرکزی ہدف تھے یا نہیں، تاہم کہا گیا ہے کہ کمشنر نے عطیہ کنندگان کے انٹرویوز کا مطالبہ کیا کیونکہ ان کے پاس متعلقہ معلومات اور شواہد ہو سکتے تھے۔
عدالت کے فیصلے میں کہا گیا ہے کہ عطیہ کنندگان نے حالیہ صوبائی انتخابی مالیاتی قوانین میں تبدیلیوں کا حوالہ دیتے ہوئے انٹرویوز میں شرکت سے انکار کیا، لیکن جج نے وضاحت کی کہ یہ قوانین کمشنر کی انٹرویوز کا حکم دینے کی طاقت کو محدود نہیں کرتے۔مزید برآں، ان قوانین کے تحت اگر کمشنر کو کسی معاملے میں اطلاع ملنے کے ایک سال گزر جائے تو وہ انتخابات کے مالی قواعد و ضوابط کی خلاف ورزی کرنے والوں پر جرمانہ یا سزا عائد نہیں کر سکتا، مگر یہ مدت انٹرویوز میں شرکت کی پابندی کو کم نہیں کرتی۔
