اردوورلڈکینیڈا( ویب نیوز)دو البرٹا کابینہ وزراء کا کہنا ہے کہ مالیاتی خدشات وہ بنیادی وجہ تھے جن کی بنا پر یونائیٹڈ کنزرویٹو حکومت نے چارٹر کے نان اسٹینڈنگ کلاز کا استعمال کرتے ہوئے اساتذہ کے حقوق کو معطل کیا اور صوبے بھر میں جاری اساتذہ کی ہڑتال کو ختم کرنے کا فیصلہ کیا۔

انفراسٹرکچر کے وزیر مارٹن لانگ نے نومبر میں اپنے حلقے کے ووٹرز کو لکھے گئے خط میں کہا کہ حکومت یہ خطرہ مول نہیں لے سکتی تھی کہ مزدور تنازعہ ثالثی کے عمل تک جائے، جس سے صوبے کو سینکڑوں ملین ڈالر کے اضافی اخراجات کا سامنا کرنا پڑ سکتا تھا۔

انہوں نے لکھاایک ثالث ممکنہ طور پر دونوں فریقین کے درمیان درمیانی راستہ نکالتا، جس سے ٹیکس دہندگان پر سینکڑوں ملین، حتیٰ کہ ممکنہ طور پر بلینز ڈالر کا اضافی بوجھ پڑ سکتا تھا۔خط میں مزید کہا گیا کہالبرٹنز نے اس حکومت کو ذمہ دارانہ فیصلے کرنے کے لیے منتخب کیا ہے  نہ کہ انہیں کسی اور کے سپرد کرنے کے لیے۔

بدھ کے روز جب رپورٹرز نے لانگ کے خط اور ممکنہ مالی اخراجات پر وزیرِ تعلیم دیمیٹریوس نیکولائیڈیز سے سوال کیا تو انہوں نے کہا کہ بڑے مالی اور پالیسی اثرات والے فیصلے منتخب نمائندوں کو کرنے چاہییں، نہ کہ کسی غیر منتخب تیسرے فریق کو۔

انہوں نے کہا کہ اس صورت حال میں حکومت کو “بلینز آف ڈالرز” کے ممکنہ اثرات اور کلاس روم مینجمنٹ پالیسیوں میں بڑی تبدیلیوں کا سامنا تھا۔ان کا کہنا تھا:میرے نزدیک ایسے حتمی فیصلے منتخب نمائندوں کے ہاتھ میں ہونے چاہییں، نہ کہ آزاد اور غیر منتخب ثالثوں کے سپرد۔”

وزیراعظم ڈینیئل اسمتھ کی سربراہی میں یو سی پی حکومت نے اکتوبر کے آخر میں ایک بل منظور کیا تھا، جس کے ذریعے صوبے بھر میں تین ہفتے تک جاری رہنے والی اساتذہ کی ہڑتال کو ختم کیا گیا۔ اس بل کو قانونی چیلنج سے بچانے کے لیے نان اسٹینڈنگ کلاز کا استعمال کیا گیا۔

اس وقت اسمتھ نے اس فیصلے کو طلبہ کی صحت اور فلاح سے جوڑتے ہوئے کہا تھا کہ طویل ہڑتال بچوں کی ذہنی، سماجی اور تعلیمی زندگی کو نقصان پہنچا رہی ہے۔

البرٹا ٹیچرز ایسوسی ایشن کے صدر جیسن شِلنگ نے بدھ کو ایک انٹرویو میں دونوں وزراء کے بیانات پر تشویش کا اظہار کیا اور کہا کہ لانگ کا خط دراصل اس بات کا اعتراف ہے کہ حکومت تعلیم کے شعبے کو کم فنڈنگ دے رہی ہے۔

انہوں نے کہاکیا انہیں یہ فکر تھی کہ کہیں انہیں عوامی تعلیم پر پیسہ خرچ نہ کرنا پڑ جائے کیونکہ ثالث اساتذہ کے مؤقف کو ترجیح دے سکتا تھا؟انہوں نے مزید کہا کہ اگر حکومت ثالثی کو غیر مناسب طریقہ قرار دے رہی ہے تو یہ البرٹا اور پورے کینیڈا کی مزدور تحریک کے لیے پریشان کن بات ہے۔

ہڑتال کے دوران دونوں فریقوں کی تجاویز میں تقریباً 2 بلین ڈالر کا فرق موجود تھا۔ اکتوبر کے وسط میں اساتذہ نے حکومت کی اس پیشکش کو مسترد کر دیا تھا جس میں ہڑتال ختم کر کے “بہتر ثالثی” کی طرف جانے کی درخواست کی گئی تھی۔ اساتذہ کا مؤقف تھا کہ اس تجویز میں کلاس سائز کے تعین جیسے اہم مسئلے پر بات چیت کی اجازت نہیں تھی۔

بدھ کو کینیڈین پریس کو جاری کیے گئے بیان میں لانگ نے دوبارہ کہا کہ ان کی اولین ترجیح بچوں کو جلد از جلد کلاس روم میں واپس لانا تھا۔ انہوں نے صوبے کے 6.4 بلین ڈالر کے تخمینہ شدہ خسارے کا بھی حوالہ دیا، جس کے باعث حکومت “مہینوں کی ثالثی” اور ممکنہ “بلینز مزید اخراجات” برداشت نہیں کر سکتی تھی۔

اپوزیشن این ڈی پی کے لیڈر ناہید نینشی نے کہا کہ یہ خط واضح کرتا ہے کہ حکومت نہ ثالثی پر یقین رکھتی ہے اور نہ ہی اجتماعی سودے بازی کے چارٹر حق کو تسلیم کرتی ہے۔

نینشی نے کہاحکومت نے اعتراف کر لیا کہ انہوں نے نان اسٹینڈنگ کلاز کا استعمال جان بوجھ کر ایک غیر آئینی قانون بنانے کے لیے کیا کیونکہ وہ تعلیم پر ملک میں سب سے کم خرچ جاری رکھنا چاہتے ہیں۔

اس کے جواب میں نیکولائیڈیز نے یو سی پی کی کارکردگی کا دفاع کرتے ہوئے کہا کہ گزشتہ دو برسوں میں تعلیم کے لیے مجموعی فنڈنگ میں تقریباً 12 فیصد اضافہ کیا گیا ہے۔

انہوں نے کہاہم نے نئے اسکولوں کی منظوری اور تعمیر پر تیزی سے کام کیا ہے، فنڈنگ بڑھائی ہے، اور مجھے یقین ہے کہ البرٹنز جلد ہی ان سرمایہ کاریوں کے مثبت نتائج دیکھیں گے