اردو ورلڈ کینیڈا ( ویب نیوز )پاکستان نے اتوار کے روز افغانستان کے قائم مقام وزیر دفاع ملا محمد یعقوب کی جانب سے لگائے گئے الزامات کو "قیاس پر مبنی الزامات” قرار دیا اور کہا کہ یہ بیان "انتہائی افسوسناک” ہے اور "ذمہ دارانہ سفارتی طرز عمل کے اصولوں” کی خلاف ورزی ہے۔
دفتر خارجہ کے ترجمان نے ایک بیان میں کہا کہ "کسی ثبوت کی عدم موجودگی میں، جیسا کہ خود افغان وزیر نے اعتراف کیا ہے، ایسے فرضی الزامات انتہائی افسوسناک اور ذمہ دارانہ سفارتی طرز عمل کے اصولوں کے منافی ہیں۔”
ترجمان نے کہا کہ "ہم افغان عبوری حکام پر زور دیتے ہیں کہ وہ افغانستان کی جانب سے کیے گئے بین الاقوامی وعدوں کی تکمیل کو یقینی بنائیں کہ وہ اپنی سرزمین کو کسی بھی ملک کے خلاف دہشت گردی کے لیے استعمال کرنے کی اجازت نہ دے۔”
اس سے قبل طالبان کے قائم مقام وزیر دفاع نے دعویٰ کیا تھا کہ پاکستان نے امریکی ڈرونز کو افغانستان تک رسائی کے لیے اپنی فضائی حدود استعمال کرنے کی اجازت دی تھی، اس الزام کی پاکستان نے حال ہی میں کابل میں امریکی فضائی حملے کے بعد تردید کی ہے۔
قائم مقام وزیر دفاع ملا محمد یعقوب نے کابل میں ایک نیوز کانفرنس میں صحافیوں کو بتایا کہ امریکی ڈرون پاکستان کے راستے افغانستان میں داخل ہو رہے ہیں۔
انہوں نے کہا کہ ہماری معلومات کے مطابق ڈرون پاکستان کے راستے افغانستان میں داخل ہو رہے ہیں، وہ پاکستان کی فضائی حدود استعمال کرتے ہیں، ہم پاکستان سے کہتے ہیں کہ اپنی فضائی حدود ہمارے خلاف استعمال نہ کریں۔
