197
اردو ورلڈ کینیڈا ( ویب نیوز ) : الیکشن کمیشن نے پنجاب میں انتخابات کی تاریخیں تجویز کر دیں جب کہ خیبرپختونخوا میں انتخابات کے لیے گورنر کو خط ارسال کر دیا گیا ہے۔
چیف الیکشن کمشنر سکندر سلطان راجہ کی زیر صدارت اجلاس ہوا جس کے بعد الیکشن کمیشن نے صدر مملکت اور گورنر خیبرپختونخوا کو خطوط لکھے ہیں۔الیکشن کمیشن نے پنجاب میں 30 اپریل سے 7 مئی تک انتخابات کی تاریخیں تجویز کر دیں۔الیکشن کمیشن نے خیبرپختونخوا کے گورنر کو بھی خط لکھا ہے جس میں کہا گیا ہے کہ صوبے میں الیکشن کے حوالے سے آپ کے جواب کا انتظار ہے۔الیکشن کمیشن کا کہنا ہے کہ سپریم کورٹ کے فیصلے کی روشنی میں صدر مملکت کو خط بھیجا گیا ہے۔سپریم کورٹ کے فیصلے سے قبل صدر مملکت نے دونوں اسمبلیوں میں انتخابات کے لیے 9 اپریل کی تاریخ دی تھی۔بعد ازاں سپریم کورٹ نے معاملے کا نوٹس لیتے ہوئے اپنے فیصلے میں دونوں صوبوں میں 90 روز میں انتخابات کرانے کا حکم دیا ہے۔
