امریکی وزیر خارجہ سے رابطے کے دوران چینی وزیر خارجہ نے فوری بین الاقوامی امن کانفرنس کے انعقاد کا مطالبہ کرتے ہوئے کہا کہ اسرائیل فلسطین تنازعہ بڑھنے اور تنازع قابو سے باہر ہونے کا خدشہ ہے۔
چینی وزیر خارجہ نے کہا کہ چین بین الاقوامی قانون کی خلاف ورزی اور شہریوں کو نقصان پہنچانے کے کسی بھی عمل کی مذمت کرتا ہے۔
واضح رہے کہ ایک طرف اسرائیل کی جانب سے غزہ پر بمباری کا سلسلہ جاری ہے تو دوسری جانب لبنان کے سرحدی علاقوں پر بھی حملے کیے جارہے ہیں جب کہ اسرائیلی فورسز نے شامی شہر حلب پر حملوں کا دعویٰ بھی کیا ہے۔
سعودی عرب کے اسرائیل کیساتھ تعلقات بحالی کے لیے مذاکرات معطل
دوسری جانب لبنان کی مزاحمتی تنظیم حزب اللہ نے لبنانی علاقوں میں گولہ باری کے جواب میں اسرائیل پر راکٹوں اور ٹینک شکن میزائلوں سے حملہ کرنے کا دعویٰ کیا ہے جس میں شیبا فارمز کے سرحدی علاقے میں اسرائیلی فوجی ٹھکانوں کو نشانہ بنایا گیا ہے۔
حزب اللہ نے کہا کہ یہ کارروائی اسرائیلی گولہ باری کے جواب میں کی گئی، جس میں راکٹ، ٹینک شکن گائیڈڈ میزائل اور مارٹر گولے استعمال کیے گئے۔
یاد رہے کہ دو روز قبل بیروت کے نواحی علاقے میں ایک ریلی سے خطاب کرتے ہوئے حزب اللہ کے نائب رہنما کا کہنا تھا کہ وہ اسرائیل کے خلاف جنگ میں حماس کا ساتھ دینے کے لیے پوری طرح تیار ہیں، وقت آنے پر مداخلت کریں گے۔
فلسطینی وزارت صحت کے مطابق غزہ پر اسرائیلی حملوں میں شہید ہونے والے فلسطینیوں کی تعداد 2 ہزار 215 تک پہنچ گئی ہے جب کہ مغربی کنارے میں 53 فلسطینی شہید ہوئے۔
