اردو ورلڈ کینیڈا ( ویب نیوز ) ا مریکہ نے بھارت کو ایک اور جھٹکا دیتے ہوئے ایران کے ساتھ تیل کی خفیہ تجارت میں ملوث 7 بھارتی کمپنیوں پر پابندیاں عائد کر دیں۔
امریکی محکمہ خارجہ کی جانب سے جاری بیان میں کہا گیا ہے کہ ایران تیل سے حاصل ہونے والی آمدنی کو مشرق وسطیٰ کو غیر مستحکم کرنے اور اپنے ہی لوگوں کا استحصال کرنے کے لیے استعمال کر رہا ہے۔ان سرگرمیوں میں سہولت فراہم کرنے والی دنیا بھر میں 20 کمپنیوں پر سخت اقتصادی پابندیاں عائد کی جا رہی ہیں، جن میں سے 7 بھارت میں مقیم ہیں۔امریکی حکام کے مطابق ان کمپنیوں کے علاوہ 10 ایسے جہازوں کے خلاف بھی کارروائی کی جا رہی ہے جو ایرانی پیٹرولیم اور پیٹرو کیمیکل مصنوعات کی نقل و حمل میں ملوث پائے گئے ہیں۔یہ اقدام صدر ٹرمپ کے ہندوستان پر 25 فیصد درآمدی ٹیرف اور اضافی مالی جرمانے کے اعلان کے ایک دن بعد سامنے آیا ہے۔ٹرمپ نے اپنے سوشل میڈیا پلیٹ فارم ٹروتھ سوشل پر دو ٹوک الفاظ میں کہا کہ بھارت دوستی کی آڑ میں تجارتی منافقت میں ملوث ہے۔صدر ٹرمپ نے کہا کہ ہم نے ہمیشہ ہندوستان کو اچھا دوست سمجھا ہے لیکن حقیقت یہ ہے کہ ہندوستان نے امریکہ کے ساتھ غیر منصفانہ تجارت کی ہے۔”اس کے ٹیرف ناقابل قبول حد تک زیادہ ہیں اور اس کی غیر مالیاتی رکاوٹیں انتہائی سخت ہیں۔ اب ہندوستان کے لیے جواب دینے کا وقت ہے۔”