اردو ورلڈ کینیڈا ( ویب نیوز ) امریکی F-16 لڑاکا طیارہ جنوبی کوریا میں گر کر تباہ ہو گیا۔

امریکی میڈیا کے مطابق یہ واقعہ ہفتے کے روز پیش آیا جس میں امریکی F-16 لڑاکا طیارہ تربیتی پرواز کے دوران جنوبی کوریا میں ایک بڑے امریکی فوجی اڈے کے قریب گر کر تباہ ہو گیا۔

امریکی فوج نے بھی تصدیق کی ہے کہ طیارہ آٹھویں فائٹر ونگ کا تھا جو ہفتے کی صبح تقریبا دس بجے اوسان ایئربیس کے قریب کھیتوں میں گر کر تباہ ہوا۔میڈیا رپورٹس کے مطابق امریکی عسکری ذرائع کا کہنا ہے کہ طیارہ گرنے کے نتیجے میں پائلٹ کو طیارے سے بحفاظت باہر نکال لیا گیا، جسے مقامی طبی مرکز منتقل کردیا گیا ہے۔

جب کہ حادثے کے نتیجے میں کوئی جانی نقصان نہیں ہوا۔جنوبی کوریا کے حکام کا کہنا ہے کہ حادثے کی اطلاع ملتے ہی مقامی ریسکیو اہلکار موقع پر پہنچ گئے اور فائر حکام نے طیارے میں لگی آگ پر قابو پالیا۔امریکی حکام کے مطابق طیارے میں سوار پائلٹ معمول کی تربیتی پرواز پر تھا تاہم حادثے کی وجوہات جاننے کے لیے تحقیقات شروع کر دی گئی ہیں۔