اردو ورلڈ کینیڈا ( ویب نیوز ) تیل کی پیداوار اور چین کے ساتھ کئی
تجارتی معاہدے کرنے پر سعودی عرب سے ناراض امریکا نے
ایک بار پھر اسٹریٹجک پارٹنرشپ کی خواہش کا اظہار کردیا۔
العربیہ کو خصوصی انٹرویو دیتے ہوئے امریکی قومی سلامتی کونسل کے اسٹریٹجک کمیونیکیشنزکوآرڈینیٹر
جان کربی نے کہا کہ سعودی عرب کے ساتھ ہمارے 80 سال سے زیادہ کے تعلقات ہیں جو عوامی مفاد میں
جاری رہنا چاہیے۔ جان کربی نے اس خواہش کا بھی اظہار کیا کہ امریکہ سعودی عرب کی قومی سلامتی سے
متعلق اسٹرٹیجک پارٹنرشپ کو اپنے عوام کے فائدے کے لیے جاری رکھنا چاہتا ہے۔ امریکی قومی سلامتی کونسل
کے اسٹریٹجک کمیونیکیشن کوآرڈینیٹر جان کربی نے کہا کہ نئی امریکی حکومت میں جو بائیڈن انتظامیہ
سعودی عرب کے ساتھ تعلقات کو مستحکم کرنے کے لیے سنجیدہ کوششیں کر رہی ہے۔جان کربی نے کہا کہ انہیں
سعودی حکومت سے مثبت اشارے ملے ہیں۔ ہم مشرق وسطیٰ میں پائیدار امن میں سعودی عرب کے اہم کردار سے
بخوبی واقف ہیں اور ہم مشترکہ دشمن کو وہاں قدم جمانے کی اجازت نہیں دیں گے۔ واضح رہے کہ امریکی صدر جو بائیڈن
کی جانب سے تیل کی پیداوار بڑھانے کے مطالبے کو سعودی عرب سمیت اوپیک ممالک نے مسترد کردیا تھا
جب کہ حال ہی میں سعودی عرب نے چین کے ساتھ درجنوں تجارتی معاہدے کیے ہیں
