ارد وورلڈ کینیڈا ( ویب نیوز )پاکستان تحریک انصاف کے رہنما اور سابق وفاقی وزیر عامر محمود کیانی نے سیاست سے ریٹائرمنٹ کا اعلان کر دیا۔سابق وفاقی وزیر نے پریس کانفرنس کرتے ہوئے کہا کہ میرا تعلق فوجی خاندان سے ہے

، ہم نے کرپشن کے خلاف سیاست شروع کی، 9 مئی کے واقعات دردناک تھے، میں نے کبھی پاک فوج کے خلاف بیان نہیں دیا۔ دہشت گردی کے مقدمات درج کر لیے گئے۔عامر محمود کیانی نے کہا کہ میں ڈیڑھ ماہ سے پارٹی اجلاس میں بھی نہیں گیا، سوچنا ہوگا کہ کیا ہم سیاست کررہے ہیں  ۔انہوں نے کہا کہ پاکستان کی بقا پاک فوج کے افسروں اور جوانوں کی وجہ سے ہے، پاک فوج کے جوان روزانہ قربانیاں دے رہے ہیں، 9 مئی کے واقعے میں چیئرمین عمران خان سے ملنے بھی گئے، سیاسی جماعتیں آتی جاتی رہتی ہیں۔عامر محمود کیانی نے کہا کہ عمران خان خود کہتے ہیں کہ ادارے اہم ہیں، جی ایچ کیو اور لاہور کور کمانڈر کا واقعہ بہت تکلیف دہ ہے، ان اداروں نے ہمیشہ آپ کی سرحد پر جانیں دیں، ہمیں صرف سیاسی جنگ لڑنی چاہیے۔سابق وفاقی وزیر نے کہا کہ یہ ملک کی سالمیت اور بقا پر حملہ ہے، کوئی سیاسی جماعت ادارہ نہیں بنی، میں بھی سیاست سے کنارہ کشی اختیار کر رہا ہوں۔