اردوورلڈ کینیڈا ( ویب نیوز )لاہور ہائی کورٹ راولپنڈی بینچ میں عوامی مسلم لیگ کے سربراہ اور سابق وفاقی وزیر شیخ رشید کی گرفتاری کے خلاف درخواست دائر کر دی گئی۔
شیخ رشید کے وکلا سردار رازق اور سردار شہباز نے شیخ رشید کی گرفتاری کے خلاف لاہور ہائی کورٹ کے راولپنڈی بینچ میں درخواست دائر کی ہے جس میں موقف اختیار کیا گیا ہے کہ ان کے خلاف کوئی مقدمہ درج نہیں کیا گیا۔

درخواست میں آئی جی پنجاب، سی پی او، ایس ایس پی آپریشنز اور دیگر کو فریق بنایا گیا ہے اور کہا گیا ہے کہ شیخ رشید کو ایس ایس پی آپریشنز نے نجی ہاؤسنگ سوسائٹی سے اٹھایا۔
درخواست میں موقف اختیار کیا گیا کہ شیخ رشید کو ان کے بھتیجے شیخ شاکر، شیخ عمران ڈرائیور سجاد سمیت اٹھایا گیا، شیخ رشید کے خلاف کوئی مقدمہ نہیں ہے۔
درخواست میں استدعا کی گئی ہے کہ ایس ایس پی آپریشنز نے شیخ رشید کو ان کے گھر سے غیر قانونی طور پر حراست میں لیا، ہم کل سے راولپنڈی پولیس سے پوچھ رہے ہیں لیکن کوئی مناسب جواب نہیں دیا جا رہا، عدالت شیخ رشید کو بازیاب کرانے کا حکم دے۔