اردوورلڈ کینیڈا ( ویب نیوز )ڈیجیٹل مردم شماری کی منظوری کے بعد نئی حلقہ بندیوں کے معاملے پر الیکشن کمیشن کا اہم اجلاس آج ہوگا۔
نئی حلقہ بندیوں سے متعلق الیکشن کمیشن کا مشاورتی اجلاس آج صبح 11 بجے طلب کیا گیا ہے جس میں ممبران، سیکرٹری، سپیشل سیکرٹری اور متعلقہ حکام شرکت کریں گے۔ اجلاس میں قانونی ٹیم نئی حلقہ بندیوں کے حوالے سے کمیشن کو بریفنگ دے گی۔
الیکشن کمیشن نے وفاقی اور صوبائی نگراں حکومتوں کو انتخابات کے لیے بہترین ماحول بنانے کی ہدایت کرتے ہوئے ہر سیاسی جماعت کے لیے یکساں میدان بنانے کا حکم دیا ہے۔
الیکشن کمیشن نے خط میں کہا ہے کہ نگران حکومتیں منصفانہ اور شفاف انتخابات کے لیے تعاون یقینی بنائیں۔
دوسری جانب الیکشن کمیشن نے سیکر ٹری اسٹیبلشمنٹ ڈویژن سندھ اور بلوچستان کے چیف سیکریٹریز کو بھی خط لکھ دیا ہے۔
خط میں الیکشن کمیشن کی منظوری سے انتظامی افسران کے تبادلوں کا حکم دیا گیا ہے۔
خط کے متن کے مطابق انتخابات پر اثر انداز ہونے والے تمام انتظامی افسران کو تبدیل کیا جائے۔
واضح رہے کہ پی ڈی ایم حکومت نے مشترکہ مفادات کونسل کے اجلاس میں ڈیجیٹل مردم شماری کی منظوری دی تھی جس کے بعد گزشتہ ہفتے الیکشن کمیشن کے کئی اجلاس ہوئے تاہم حلقہ بندیوں کی حد بندی کرنے کے حوالے سے تاحال کوئی فیصلہ نہیں کیا گیا۔
