اردو ورلڈ کینیڈا ( ویب نیوز ) غزہ کی جنگ میں فلسطینیوں کے خلاف لڑنے سے انکار پر گرفتار ایک اسرائیلی نوجوان کو صہیونی فوج نے رہا کردیا۔اسرائیلی میڈیا کے مطابق غزہ جنگ میں لڑنے سے انکار پر گرفتار کیے گئے اسرائیلی نوجوان کو 185 دن تک جیل میں رکھا گیا۔اسرائیلی قانون کے مطابق اسرائیلی فوج میں شمولیت سے انکار پر سزائیں ہیں اور اسی قانون کے تحت اسرائیلی نوجوان کو گرفتار کیا گیا تھا۔صہیونی فوج کی جیل سے رہا ہونے والے اسرائیلی نوجوان کا کہنا ہے کہ مجھے جنگ اور قبضے کے خلاف جدوجہد میں کردار ادا کرنے کا موقع ملا۔
مجھے خوشی ہے کہ اسرائیل میں جنگ کے خلاف آواز بلند ہو رہی ہے۔واضح رہے کہ گزشتہ سال اکتوبر سے اب تک اسرائیلی حملوں میں 38 ہزار سے زائد فلسطینی شہید اور 88 ہزار سے زائد زخمی ہو چکے ہیں۔اقوام متحدہ اور دیگر عالمی اداروں کی رپورٹس کے مطابق اسرائیل نے فلسطینیوں کے خلاف خوراک کی فراہمی بھی معطل کر رکھی ہے جس کی وجہ سے بچے اور حاملہ خواتین بھوک اور افلاس سے مر رہی ہیں۔
