اردو ورلڈ کینیڈا ( ویب نیوز ) فلوریڈا میں امریکی صدر کے نجی ریزورٹ میں داخل ہونے کی کوشش کرنے والا ایک نامعلوم شخص سکیورٹی اہلکاروں کی فائرنگ سے ہلاک ہو گیا۔
امریکی حکام کے مطابق واقعہ ریاست فلوریڈا میں پیش آیا جہاں ایک بیس سالہ مشتبہ شخص نے سخت سکیورٹی حصار توڑ کر صدر کے زیرِ استعمال ریزورٹ میں زبردستی داخل ہونے کی کوشش کی۔امریکی سیکرٹ سروس کے مطابق مذکورہ شخص نے ماراے لاگو کے محفوظ علاقے میں غیر قانونی طور پر گھسنے کی کوشش کی، جس پر وہاں تعینات اہلکاروں نے فوری کارروائی کرتے ہوئے اسے روکنے کی کوشش کی۔ حکام کا کہنا ہے کہ مشتبہ فرد نے سکیورٹی ہدایات نظر انداز کیں جس کے بعد خطرے کے پیش نظر فائرنگ کی گئی اور وہ موقع پر ہی مارا گیا۔
یہ ریزورٹ سابق و موجودہ امریکی صدر Donald Trump کی ملکیت ہے اور اسے انتہائی حساس مقام قرار دیا جاتا ہے جہاں سکیورٹی کے غیر معمولی انتظامات کیے جاتے ہیں۔ سیکرٹ سروس کا کہنا ہے کہ واقعے کے فوری بعد علاقے کو گھیرے میں لے کر مکمل تلاشی لی گئی جبکہ کسی اور مشتبہ شخص کی موجودگی کے شواہد نہیں ملے۔
حکام نے بتایا کہ واقعے کی مکمل تحقیقات شروع کر دی گئی ہیں تاکہ معلوم کیا جا سکے کہ مشتبہ شخص کا مقصد کیا تھا اور آیا وہ کسی تنظیم یا گروہ سے وابستہ تھا یا نہیں۔ ابتدائی طور پر اس کی شناخت ظاہر نہیں کی گئی جبکہ قریبی سکیورٹی کیمروں کی فوٹیج کا جائزہ بھی لیا جا رہا ہے۔
واقعے کے بعد ریزورٹ اور اس کے اطراف سکیورٹی مزید سخت کر دی گئی ہے، جبکہ حکام نے عوام کو یقین دہانی کرائی ہے کہ صدر اور دیگر افراد محفوظ ہیں۔ امریکی حکام کا کہنا ہے کہ صدارتی تنصیبات پر کسی بھی قسم کی غیر قانونی سرگرمی برداشت نہیں کی جائے گی اور ایسے واقعات سے نمٹنے کے لیے سکیورٹی ادارے ہر وقت تیار ہیں۔
