مقبوضہ مغربی کنارے میں بھی اسرائیلی فورسز کی جارحانہ کارروائیوں میں کوئی کمی نہیں آئی، صہیونی فورسز نے اسپتال میں زخمیوں کو بھی نہ بخشا اور طبی عملے کے بھیس میں اسپتال میں داخل ہو کر 3 فلسطینیوں کو گولیاں مار کر شہید کردیا۔ اسرائیل سے ملنے والے 100 نامعلوم فلسطینیوں کی لاشیں اجتماعی قبروں میں دفن کر دی گئیں۔دوسری جانب اسرائیلی مغویوں کی رہائی کے لیے اسرائیل اور حماس کے درمیان ثالثی کی کوششیں جاری ہیں۔

حماس کا کہنا ہے کہ مجوزہ تجاویز کی منظوری اسرائیلی جارحیت کے خاتمے اور قابض افواج کے انخلا سے مشروط ہے۔دوسری جانب جنگ کے جنون میں مبتلا اسرائیلی وزیراعظم نے اپنی ہٹ دھرمی برقرار رکھتے ہوئے کہا ہے کہ تمام مقاصد کے حصول تک جنگ ختم نہیں ہوگی۔واضح رہے کہ 7 اکتوبر سے غزہ میں اسرائیلی حملوں میں شہید ہونے والے فلسطینیوں کی تعداد 27 ہزار 121 سے تجاوز کر گئی ہے جب کہ 65 ہزار 636 سے زائد افراد زخمی ہو چکے ہیں۔اسرائیل کے وحشیانہ حملوں اور اندھا دھند بمباری سے ہلاک اور زخمی ہونے والوں میں نصف سے زیادہ صرف بچے اور خواتین ہیں