اردوورلڈ کینیڈا ( ویب نیوز)نگران حکومت نے انٹرنیشنل مانیٹری فنڈ (آئی ایم ایف) کی ایک اور شرط پوری کرتے ہوئے پیٹرول اور ڈیزل پر لیوی کی شرح میں اضافہ کردیا۔نگرا ن حکومت نے آئی ایم ایف کی شرط پر پیٹرول پر ڈیولپمنٹ لیوی 60 روپے فی لیٹر کر دی، اسی طرح ڈیزل پر پیٹرولیم لیوی 50 روپے فی لیٹر کر دی گئی۔

اس سال عوام سے پٹرولیم لیوی کی مد میں 869 ارب روپے وصول کیے جائیں گے۔

ذرائع کا کہنا ہے کہ پیٹرولیم لیوی میں اضافے کے باعث پیٹرولیم مصنوعات کی قیمتوں میں اضافہ کیا گیا ہے۔

اس سے قبل حکومت  نےپیٹرول کی قیمت میں 14 روپے 91 پیسے اور ہائی اسپیڈ ڈیزل کی قیمتوں میں 18 روپے 44 پیسے فی لیٹر اضافہ کیا تھا۔ نئی قیمتوں کا اطلاق فوری طور پر کر دیا گیا۔

حکومت کی جانب سے اعلان کردہ نئی قیمتیں اگلے 15 روز تک نافذ العمل رہیں گی اور قیمتوں میں اضافے کے بعد پیٹرول کی قیمت 290.45 روپے فی لیٹر سے بڑھ کر 305.36 روپے فی لیٹر ہو گئی ہے۔