اردو ورلڈ کینیڈا (ویب نیوز )  200 فلیٹس غیر کشمیری ہندوؤں کے حوالے کر دیے گئے ،بقیہ فلیٹس رواں سال اکتوبر تک بھارتی شہریوں کو دیے جائیں گے۔

مذکورہ اقدام مقبوضہ وادی میں غیر کشمیری ہندوؤں کو آباد کرنا مقبوضہ کشمیر میں ہندوؤں کو بسانے کا منصوبہ ہے، محبوبہ مفتی

سری نگر ( مانیٹرنگ ڈیسک ) مقبوضہ کشمیر میں آبادی کا تناسب تبدیل کرنے کا بھارت کا ایک اور گھناؤنا اقدام سامنے آگیا ہے۔کشمیر میڈیا سروس (کے ایم ایس) کے مطابق، کل 336 فلیٹس غیر کشمیری ہندوؤں کو صرف 2200 روپے ماہانہ کی معمولی قسط پر دینے کا منصوبہ ہے۔کے ایم ایس کی رپورٹ کے مطابق 336 میں سے 200 فلیٹس غیر کشمیری ہندوؤں کے حوالے کر دیے گئے ہیں جب کہ بقیہ فلیٹس رواں سال اکتوبر تک بھارتی شہریوں کو دیے جائیں گے۔

پیپلز ڈیموکریٹک پارٹی کی سربراہ اور سابق کٹھ پتلی وزیر اعلیٰ محبوبہ مفتی نے قابض انتظامیہ کے اس اقدام کی شدید مخالفت کرتے ہوئے کہا کہ وادی میں غیر کشمیری ہندوؤں کو آباد کرنا مقبوضہ کشمیر میں ہندوؤں کو بسانے کا منصوبہ ہے۔اس حوالے سے پاکستان کے صدر عارف علوی نے بھی بیان دیا ہے جس میں انہوں نے کہا کہ بھارت نے اسرائیل سے سیکھا کہ آبادی کا تناسب کیسے بدلا جاتا ہے۔