اردوورلڈ کینیڈا( ویب نیوز)عدالت نے دہشت گردی کی دفعات کے تحت درج مقدمات میں پی ٹی آئی کے بانی چیئرمین اور شاہ محمود قریشی کو ویڈیو لنک کے ذریعے پیش کرنے کا حکم دیا ہے۔
اسلام آباد کی انسداد دہشت گردی کی عدالت نے پی ٹی آئی کے بانی چیئرمین عمران خان، شاہ محمود قریشی اور دیگر کے خلاف تھانہ کھنہ میں دہشت گردی کی دفعات کے تحت درج 2 مقدمات میں ویڈیو لنک کے ذریعے پیش کرنے کا حکم دیا ہے۔
کیس کی سماعت انسداد دہشت گردی کی عدالت کے جج طاہر عباس سپرا نے کی، جس میں پی ٹی آئی کے وکیل عدالت میں پیش ہوئے۔ دوران سماعت جج نے استفسار کیا کہ شاہ محمود قریشی سزا یافتہ قیدی ہیں، وہ کس جیل میں ہیں؟
پی ٹی آئی کے وکیل نے عدالت کو بتایا کہ شاہ محمود قریشی کو سزا نہیں ہوئی، وہ لاہور کی کوٹ لکھپت جیل میں قید ہیں۔
جج طاہر عباس سپرا نے جیل سپرنٹنڈنٹ کو ہدایت کی کہ ملزم کو آئندہ سماعت پر ویڈیو لنک کے ذریعے عدالت میں پیش کیا جائے۔ بعد ازاں عدالت نے کیس کی سماعت 7 ستمبر تک ملتوی کردی۔